As administracións locais, como marco de excelencia de convivencia cidadá, deben ser un motor fundamental para garantir a igualdade de oportunidades de mulleres e homes, co fin de mellorar o nivel e a calidade de vida das persoas e avanzar cara a unha sociedade máis democrática e xusta.

A tarefa de traballar pola igualdade efectiva entre mulleres e homes vense desenvolvendo no municipio, dunha maneira intensa, dende a elaboración e execución do I Plan Municipal de Igualdade de Oportunidades para as mulleres de Bueu durante o período 2005-2008, que supuxo un primeiro paso para incorporar a transversalidade de xénero en todas as áreas municipais.

Este I Plan sen dúbida contribuíu a mellorar a situación das mulleres no municipio a través de accións concretas dirixidas fundamentalmente á eliminación das desigualdades no ámbito da educación, formación-emprego, cultura, participación social e política, ocio e deporte, saúde, conciliación da vida laboral e familiar e violencia de xénero. Non obstante malia os avances positivos acadados durante o desenvolvemento do plan, segue sendo necesario insistir na incorporación da perspectiva de xénero no conxunto das políticas e actuacións municipais, no impulso dunha liña de acción común nas diferentes áreas municipais e na necesidade de fortalecer os mecanismos de participación da cidadanía no impulso da igualdade.

Estes elementos constitúen os principios orientadores dos obxectivos e actuacións deste II Plan de Igualdade que pretenden responder ás necesidades detectadas na diagnose realizada sobre a situación das mulleres e homes no municipio, nos resultados da avaliación do plan anterior así como nas demandas expresadas polo persoal técnico, político e entidades sociais do municipio.

Este II Plan polo tanto, debe ter como obxectivos prioritarios avanzar na procura dunhas prácticas dirixidas a mellorar a situación social, económica e política da cidadanía así como, na asunción de responsabilidades, na sensibilización e formación do persoal político e técnico, co fin de implicar a toda a institución e responder no campo da igualdade os desafíos económicos, políticos e sociais dunha sociedade de principios do século XXI.

Sendo o principio reitor do noso plan a transversalidade de xénero, optamos por estruturar o plan en oito áreas de intervención, e un eixo transversal que se desenvolve a través de diferentes mecanismos, co obxectivo de conseguir cohesionar e garantir unha maior efectividade e operatividade na consecución da igualdade.